Im Februar, im Februar...
gaht de TV as Skiweekend, wie jedes Jahr.

Früeh am Morge trifft mer sich bide Poscht,
und warted bime Bierli, bis ali da sind, Proscht!

Ufem Weg nach Henggart, im feudale Car,
freued mer ois scho uf die hübsch Dameriege, isch ja klar

"Aber wo isch denn d'Sina?" - d'Natti chunt elei
... sorry, sie hät d'Grip und isch am chotze dihei

De Chauffeur isch immer wieder chli am umemotze
mer sölled nid im Gang stah und bim Brünzle herehocke?!

Aber trotz Schneetribe bringt er ois sicher as Ziel
Tschiertsche da simmer, vo dir erwarted mer vil

Die vier Skilift die hämmer zwar schnell gseh
aber glücklicherwis häts genau so vil Beizli oder sogar na es paar meh

Eis im spezielle häts ois bsunders atah
Uf de Jochalp, dete hämmer es paar Batzeli durelah

Öb Skiliftbügel, Huuskafi oder Älplerröschti
mitem TV z'fiire isch eifach s'Gröschti

De Plausch gha hämmer au am Froilein, de Yvonne
obwohl die einte händere nume gseit "Bedienung" ;-)

Vorem Znacht simmer na schnell ghüpft in Pott
miteme chüele Bierli, eifach herrlich, sapperlott

Die cheibe Nudle zum Znacht händs grausam i sich gha
da händ die einte nachane grad müese go ligge gah

Ide Bar händ es paar bis am Morge früeh möge tanze und singe
mir hät das leider nid ganz so lang wele glinge

Am Sunntigmorge hämmer wele goge Zmorge esse
aber d'Türe sind verschlosse gsi, ich glaub sie händ ois vergesse

Zum Glück isch denn aber scho na öpper cho
so das mir glich na zu oisem Kafi sind cho

Drufabe simmer wieder schnell uf d'Ski
wil so en Sunntig gaht amigs vil z'schnell verbi

Es paar wenig Nase händ nüme möge fahre
die händ halt eifach müese z'Fuess zude Bare

De Zmittag isch mer namal id Jochalp go esse
wil de Böse hät dete sin Schnupf vergesse

De isch denn leider nüme fürecho, Gottfriedstutz
mir händ ihn denn tröschted miteme "gsunde" Kafi Lutz

So isch de Sunntig eigentlich wie de Samschtig verloffe,
die einte sind Ski gfahre, die andere händ gsoffe

Gäg die Foifi hämmer ois denn wieder troffe bim Car
alli gsund und munter, dafür simmer dankbar

S'Gepäck isch zwar nid bi allne gsi komplett,
leider hämmer das erscht z'Buech gmerkt, das isch gar nid nett.

Es isch uf jede Fall wieder mal es super Skiweekend gsi -
ich bin sicher mir sind au s'nöchscht Jahr wieder debi!

Recht herzliche Dank ad Organisatore, Natti und Sina
Ihr händ das super gmacht, mit eu ischs eifach prima!

Aber au es herzlichs Dankeschön an Reschte
mit eu feschte macht eifach Spass - ihr sind die beschte!